මම ඉන්නෙ අතරමං වෙලා මුහුදක...

මම ඉන්නෙ අතරමං වෙලා මුහුදක
එක පැත්තකිං පේනවා මට දූපතක්
තවත් පැත්තකිං තව එකක්...
දැං මම යන්නෙ කොයිකට ද
ඒකයි ප්‍රධාන ප්‍රශ්නය මෙතන

එක දූපතක්
රන් ආකරයක් සහ සුරපුරයක්...
අනෙකෙ ඒ හැටි දෙයක් නැතත්
සාමාන්‍යයෙං අවුලක් නැති එකක්...

දැං යන්නෙ කෝකට ද...?

සුරපුරයක් වගේ උනත් පළවෙනි දූපත
ඒක තියෙන්නෙ ගොඩාක් ඈත...
අර පේන ක්ෂිතිජ ඉමටත් එහා...

ඒ වගේම තවත් දාහක් දෙනා
පීනනවා ඒ දූපතටම
හැබැයි දූපත ලැබෙන්නෙ
ඉස්සෙල්ලාම යන කෙනාට
මං ඉන්නෙ පිටිපස්සෙංම
තව නවසිය අනූ නමයක්ම ඉස්සරහිං

අනෙක් දූපත නං තියෙන්නෙ අත ළග
පීනන්න අත දික්කරද්දිත් අත වැදෙන මානෙ

ඒ වගේම අරකට වගේ මේකට
නෑ මහා සෙනගක්
තවත් හිකනල්ලු දෙතුං දෙනෙක්
ඈතිං ගෑටුවත්
මට මගේම කරගන්න පුලුවං ඒක
කිසිම ගේමක් නැතුව...

ඒත් මම අවුරුදු ගානක් පීනුවෙ
අර පළවෙනි දූපත හොයාගෙන
එහෙම යද්දි අහම්බෙං හම්බෙච්ච එකක් මේක
තාම මාස ගානයි පේන්න අරං...

එහෙමත් නැත්තං මට කරන්න තියෙන්නෙ
මේ මහා සාගරයෙ
තවත් ඉස්සරහට පීනන එක
එතකොට සමහර විට
මුණ ගැහේවි මේ එකකටවත් වඩා හොද දූපතක් මට

දැං මොකෝ කරන්නෙ මම
අවුරුදු ගානක් ලුහුබැඳන් ගිය
දූපතට යනව ද
අහම්බෙකින් ළං වුනු අලුත් එක මගේ කරගන්නව ද
එහෙමත් නැත්තං..
දිගින් දිගටම ඉස්සරහටම යනවද ?

[අබ්දුල් උමර් සහන් නෙත්මිණ ]